Entre o 11 e o 12 de agosto, cando se cumpren 51 anos do asasinato, pola policía franquista, de Xosé Ramón Reboiras Noia, desenvolveranse varios actos na súa lembranza.
O martes 11 de agosto, o Concello de Fene procederá a inaugurar un monólito ás 13h, no paseo marítimo de San Valentín, coa presenza de Suso Seixo, presidente da Fundación Moncho Reboiras; Francisco Rodríguez, presidente da Fundación Terra e Tempo e Sandra Permui, alcaldesa da devandita localidade.
Na mesma data, mais ás 19h, celebrarase en Compostela unha homenaxe a "Moncho" Reboiras, ao pé do monumento que se lle erixíu no mes de abril na Carreira do Conde, no que intervirán o historiador e profesor universitario Uxío-Breogán Diéguez; a profesora xubilada de ensino secundario Encarna Otero; o secretario xeral da CIG, Paulo Carril; pechando o acto a concelleira de Cultura e Memoria Histórica da capital galega, Míriam Louzao.
Así mesmo, o 12 de agosto, no propio aniversario do asasinato do militante nacionalista Xosé Ramón Reboiras Noia, realizarase unha oferenda floral ás 12h no cemiterio de Imo (Dodro), onde descansan os restos do que fora dirixente da UPG e principal organizador do Sindicato Obreiro Galego (SOG). Realizará Suso Seixo a referida oferenda, en nome da "Comisión Organizadora dos actos do 50 aniversario", conformada polas Fundación Moncho Reboiras, Terra e Tempo e Galiza Sempre.
E ás 13h, igualmente en Dodro procederase, na Eira da Lavandeira, por parte do alcalde da localidade, á entrega á familia de Reboiras Noia do título de fillo predilecto do Concello.
