Na madrugada do pasado 12 de maio, a estatua de Xosé Ramón, “Moncho”, Reboiras Noia (recén inaugurada en Compostela, por subscrición popular) apareceu vandalizada con numerosas manchas de pintura vermella. Segundo apuntan algúns medios de comunicación, esta vandalización foi acompañada dunha nota manuscrita en árabe que afirmaría, entre outras cousas, que “o terrorismo nunca é a solución”. Unha falsa bandeira para despistar.
Desde a Fundación Moncho Reboiras queremos manifestar a nosa máis enérxica condena a estes feitos, sinalando, así mesmo, que as manifestacións de responsábeis políticos do Partido Popular contra a significación da figura de Reboiras desde a inauguración do monumento (manifestacións que xa denunciamos oportunamente, por seren profundamente antidemocráticas), actuaron de efecto chamada.
A campaña do PP contra da homenaxe a Reboiras, mesmo ameazando o seu candidato á alcaldía de Compostela de retirar a estatua de chegar a ser alcalde, non é casual. Obedece ao espírito franquista, á ideoloxía de extrema dereita que está moi presente nas filas deste partido (que nunca fixo un rexeitamento expreso da ditadura de Franco).
As críticas tan exacerbadas do PP contra a colocación da estatua a Moncho Reboiras só obedecen ao malestar que lles produce que se honre publicamente a todas aquelas persoas antifascistas, que se enfrontaron valentemente á barbarie que representaba a ditadura de Franco, en defensa da democracia, da mellora da calidade de vida das clases populares, e no caso do Moncho Reboiras tamén en defensa dos dereitos nacionais de Galiza.
Mentres manteñen desde o PP esta actitude indigna e antidemocrática contra os loitadores e loitadoras pola liberdade, vítimas das balas fascistas, manteñen unha posición xustificadora de dirixentes que pertenceron ao réxime ditatorial, que tiveron responsabilidades directas na política represiva e nos asasinatos de demócratas cometidos polo réxime en varios momentos históricos, como é o caso do fundador do Partido Popular, Manuel Fraga Iribarne, que era membro do goberno de Franco no ano 1975, cando foi asasinado Moncho Reboiras, ou fusilados os loitadores antifascistas Xosé Luis Bravo e Humberto Baena, así como Ministro do Interior, polo tanto responsábel político directo, cando foron asasinados en Victoria sete traballadores por disparos da policía.
Desde a Fundación Moncho Reboiras denunciaremos xudicialmente a vandalización do monumento a Xosé Ramón Reboiras Noia e seguiremos a homenaxear aos defensores da liberdade e da xustiza social, en Galiza e en calquera parte do mundo, e confrontando coa barbarie fascista e os ataques que preconiza o PP á memoria histórica democrática, e xa que logo á democracia, e á autodeterminación das nacións sen Estado.
Compostela 13 de maio de 2026
Padroado da Fundación Moncho Reboiras
