Hoxe, 5 de abril de 2026, a Comisión Organizadora dos Actos Conmemorativos do 50 Aniversario do Asasinato de Moncho Reboiras dá por rematada a campaña, desenvolvida durante os últimos tres meses e medio, de recollida de doazóns para custear a escultura en homenaxe a Xosé Ramón, "Moncho", Reboiras Noia, realizada por Carlos Fernández en colaboración con Cuqui Piñeiro.
Desde a devandita Comisión, integrada polas Fundacións Moncho Reboiras, Terra e Tempo e Galiza Sempre, queremos agradecerlle a todas as persoas que fixeron achegas, a súa xenerosidade, solidariedade e recoñecemento a "Moncho" Reboiras, asasinado con apenas 25 anos polo seu compromiso patriótico e democrático (na seguinte ligazón pódese visualizar a listaxe de doazóns).
Así mesmo, convidamos a todas as persoas que fixeron doazóns, así como ao conxunto do pobo galego, a que participen no acto de inauguración da escultura, a celebrar na capital galega o vindeiro sábado 18 de abril, ás 17:00h, na rúa Carreira do Conde.
Acto de inauguración
No acto de inauguración da escultura intervirán Xesús Seixo, presidente da Fundación Moncho Reboiras; Elvira Souto, portavoz da Comisión de Honra; Francisco Rodríguez, presidente da Fundación Terra e Tempo, así como a alcaldesa de Santiago de Compostela, a nacionalista Goretti Sanmartín.
